თქვენი ცა, მისი არჩევანი: აბასთუმნის საჰაერო სივრცე და პირადი ვარსკვლავთმრიცხველი
აბასთუმნის თავზე ცა დაიხურა! დიახ, დღეიდან თვითმფრინავებისთვის, რომლებიც ევროპასა და აზიას შორის დაფრინავდნენ, საქართველოს ნაწილი "აკრძალულ ზონად" იქცა. მიზეზი? ოფიციალურად, აბასთუმნის ასტროფიზიკურ ობსერვატორიას "გამჭვირვალე ცა" სჭირდება, რათა უკეთ დააკვირდეს ვარსკვლავებს. ვინ არ იტყვის უარს გამჭვირვალე ცაზე, მით უმეტეს, როცა ასტრონომია გიყვარს?
თუმცა, „რადიო თავისუფლების“ ჟურნალისტური გამოძიება გვეუბნება, რომ ამ "ობსერვატორიის" უკან შეიძლება სხვა, უფრო მიწიერი "ვარსკვლავთმრიცხველი" იდგეს. კერძოდ, ბიძინა ივანიშვილი, რომელსაც აბასთუმანში 2020 წლიდან რეზიდენცია აქვს და შვეულმფრენის დასაჯდომიც კი დაუფუძნებია. საჰაერო სივრცის ჩაკეტვის ეს გადაწყვეტილება, თურმე, "ბიძინას ახირება" ყოფილა.
აბასთუმნის გარშემო 52 კმ-ის დიამეტრზე, მიწიდან "უსასრულობამდე" (GND-UNL, ასე წერენ რუკებზე), საერთაშორისო ფრენები აიკრძალა. ეს ნიშნავს, რომ ევროპა-აზიის სატრანზიტო მარშრუტები იძულებულნი არიან, საქართველოს ჩრდილოეთით გადაინაცვლონ. შედეგი? გაზრდილი ფრენის დრო, მეტი საწვავი, გაძვირებული ბილეთები და, ალბათ, ნაკლები სურვილი, ქართული ცა საერთოდ გამოიყენო. ჩვენი ავიაციის წყაროები წუწუნებენ, რომ ეს ყველაფერი "კომპანიების ჯიბეზე აისახება", მაგრამ, რეალურად, ქართველი მგზავრების ჯიბეზე აისახება!
და აი, აქ შემოდის კომედიის ოქროს წესი: წვრილმანებში ეშმაკი იმალება. აღმოჩნდა, რომ ამ "აკრძალულ ზონას" ერთი საინტერესო გამონაკლისი აქვს: დაშვებულია ფრენა ტერიტორიაზე მოსული ან წამსვლელი ხომალდებისთვის. ანუ, თუ პირდაპირ აბასთუმანში მიფრინავ ან იქიდან მოფრინავ, შეგიძლია. და რადგან ერთადერთი ოფიციალური შვეულმფრენის დასაჯდომი სწორედ ივანიშვილს ეკუთვნის... ჰმ, დამთხვევა? ასტრონომები ამბობენ, რომ სამყარო სავსეა საიდუმლოებებით.
ასტროფიზიკური ობსერვატორიის დირექტორი, რომელიც, თურმე, წლების განმავლობაში ითხოვდა ამ ცის ჩაკეტვას, ამ ფაქტის შესახებ „რადიო თავისუფლების“ ჟურნალისტებისგან გაიგო – სურვილი აუსრულდა, მაგრამ არავინ აცნობა. წარმოიდგინეთ, თქვენი ოცნება ასრულდება და ამას გაზეთიდან იგებთ!
მოკლედ, თქვენი ქვეყანა, თქვენი არჩევანი? როგორც ჩანს, ზოგჯერ ეს "თქვენი" ერთი კონკრეტული "მისი" აღმოჩნდება ხოლმე. მთავრობა იცავს "გამჭვირვალე ცას" ასტრონომიისთვის, ოღონდ ისე, რომ გამჭვირვალობა მხოლოდ ერთ ადამიანს ეხება, მთელ ერს კი - დაბურული.